ARBAYEEN E SHIDDAT

ARBAYEEN E SHIDDAT:

jo Ahaadees e kareema main post kar raha hun wo Huzoor Mehboob e Millat Maulana Mehboob Ali khan sahab ki kitaab "Arbaeen e Shiddat" jo badmazhabon ke radd me hazrat ne tehreer farmaayi thi us se min-no-ann le raha hun aur usi se In sha Allah mazeed aur Ahaadees bhi post karunga. Aap hazraat se duaon ki guzarish hai. JAZAKALLAH

Sawaal:
Kya farmate hain Ulma e Deen va Muftiyaan e Shar e Mateen is mas'ale mein ke zaid (xyz) jo naqshbandi mujaddidi hone ka daawedaar hai kehta hain RASOOLALLAH صَلَّى اللَّهُ عَلَيْهِ وَسَلَّمَ ne hamesha kaafiron mushrikon ke saath narmi ki rawaadaari barti aur isi ki taalim di. aur kisi hadees mein kahin nahin farmaya ke kaafiron, bad-mazhabon, mushrikon, murtadon ke saath sakhti karo- phir hum kyun na un se ittehaad kare???

lihaza arz hai ke is mazmoon ki hadeesen bayaan farma kar hum gurba e Ahle sunnat ki rehnumayi farmaye.

Al-jawaab:
Zaid (xyz) apne is qaul e badtaraz bol mein saraasar kizb ( jhoota ) va muftari Alalallah wa Rasool hai ( ALLAH wa RASOOL par ilzaam lagaanewala hai). Har ek musalmaan deendaar jo kuch bhi aql se kaam le woh qaul saraasar galat hai. Kyun ke RABBE KAREEM jalla jalaaluhu ne Qur'an e karim mein Apne MEHBOOB صَلَّى اللَّهُ عَلَيْهِ وَسَلَّمَ ko yun hukm farmaya.

"Aye gaib daan pyare jihad kijiye kaafiron aur munafiqon aur kaafiron munafiqon par sakhti kijiye. aur farmata hai RAB tabaarak va ta'ala;

"Aye Habeeb muhtaram jis cheez ka Aap ko hukm diya jata hai usey khullam khulla bayaan kar dijiye aur mushrikon se rugardaani kar lijiye.

( munh pher lijiye )" to zaid ( xyz) ke naapaak qaul ka matlab yeh hua ke ma'aazAllah HUZOOR E AKRAM sallallaho alaihi va aala aalihi wasallam ne KHUDA ke hukm ke khilaaf kiya, ke hukm e ILAAHI to galzat ( sakhti ) va aeraz ( doori ) ka diya gaya magar is ke barkhilaaf ittefaaq va ittehaad barta gaya. yeh na kahega magar milli- be-deen ya sulaih kulli bad-deen. aur RABBE KAREEM jalla jalaaluhu apne pyare MEHBOOB sallallaho alaihi va aala aalihi wasallam ke jaan nisaaron Sahaba e Kiraam radiyAllahu anhum ki yun madah saraayi farmata hai.

"MUHAMMAD sallallaho alaihi va ala aalihi wasallam ALLAH ke RASOOL hain aur jo log un ke saath hain woh kaafiron par bohot sakht hain aur aapas mein bohot meharbaan" aur doosri jagah yun taareef farmayi.

"Imaan waalon par bohot narm aur kaafiron par bohot sakht hain" aur tafseer e madaarik sharif mein hai,

Hazraat Sahaba e kiraam رضي الله عنهم  ki shiddat kaafiron par is darja thi ke woh hazraat apne kapdon ko bhi kaafiron ke kapdon ke chhoone se bachaate the. apne jismon ko kaafiron ke jismon se mass hone se door rakhte the. aur har aaqil musalmaan jaanta hai ke HUZOOR E AKRAM sallallaho alaihi va ala aalihi wasallam ne kuffaar par jihaad ke liye lashkar rawana farmaye aur chand baar khud banafs nafees maidaan e jang mein jalwa afroz hokar lashkaron ki Kamaan farmayi, to kya kaafiron par lashkar kasha karana aur khud bhi baaz mauqe par fauj e islami ki Kamaan farmana, un ke khoon bahana, unke bachchon ko yateem unki aurton ko bewaa banana yeh kuffaar ke saath dosti va ittehaad hai.???

Is silsile mein kuch ahaadees e kareema rozana aapki khidmat me pesh karne ki sa'adat haasil karunga.
IN SHA ALLAH

Hadees 1:

Jaisa ke sahih riwaayat mein hai ke sulah hudaibiya ke mauqe par urwa bin mas'ood saqfi se Hazrat sayyedna Siddique Akbar  رضي الله عنه  ka farmana ke jab ke urwa ne HUZOOR E AQDAS sallallaho alaihi wa aalihi wasallam se arz kiya ke Aap ko main us waqt dekhoonga jab Aap ke yeh sab saathi aap ko chhod kar bhaag jaayege to Hazrat Sayyedna Abu Bakr Siddique رضي الله عنه ne urwa ko farmaya chus le tu laat ka bazr (sharm gaah), kya hum bhaagenge, ya hum HUZOOR ko chhod denge.?
ahle aql v Daanish se poocho ke yeh kaisi narmi v leenat hai. aur zaid aur is ke hum nawaon ko sunao ke yeh kaisa yarana aur ittehaad hai aur new light ke fidaayi nechri se maloom karo ke yeh kaisi tehzeeb hai. Aur Mehboob e Khuda ke mukhaalif se Mustafa pyare ki maujoodgi mein yeh alfaz farmaye jaa rahe hain. aur zaid ka khana saaz ittehaad us waqt HUZOOR SARKAAR E DO AALAM sallallaho alaihi va aala aalihi wasallam ne bhi na barta. na to yaar e gaar ko mana kiya na unki jaanib se koyi uzr pesh kiya balke khaamoshi ikhteyaar farma kar ummat ko usey jaayez aur masnoon hone ki taaleem di lekin aql va imaan ho to maaloom ho.

Hadees 2:

Hazrat Qatada رضي الله عنه se marwi hai ke utba bin abi lahab jab Hazrat sayyedna Kulsum bint RASOOLALLAH sallallaho alaihi va ala aalihi wasallam se juda hua to Sarkaar ki khidmat e aali mein haazir hokar arz ki."main aap ke deen Islam se phir gaya aur aap ki noor e nazar ko maine talaaq di. na aap mujhe dost jaanein na main aap se mohabbat rakhta hoon."

Aap ne utba ka islam se inheraaf sun kar dua farmayi ya ALLAH tu apne kutton mein se koyi kutta is sag -e- duniya utba par musallat farmade.

Zaid (xyz) pur makr va kaid bataaye ke yeh ittehaad va dua e rehmat hai,
ya kosna aur dua-e-halaakat.???

Hadees 3:

be shak hazrat anas رضي الله عنه ne hadees bayaan ki ke kuch log ukal va urniya se Huzoor e AQDAS sallallaho ta'ala alaihi va aalihi wasallam ki khidmat mein madina taiba aakar musalmaan huye.

unke khabees mizaajon ne madina munawwara ki aab o hawa ko bura samjha aur madina sharif ki pyari rooh parwar naseemein un mareezaan e nifaaq ko na mawaafiq hui. to unhon ne arz ki YAA RASOOLALLAH hum log janglon mein rehte hain aur maweshi paalne waale hain. hum kheti baadi karne waale nahin hain. to RASOOLALLAH sallallaho alaihi va ala aalihi wasallam ne unhe chand ootniyan dene aur charaane ka hukm diya. aur farmaya ke jaao hamare ooton mein raho aur ooton ka doodh aur peshab piya karo. to woh log gaye aur jab madina munawwara ke baahar pohonche to kaafir hogaye islam laane ke baad. aur HUZOOR E AKRAM sallallaho alaihi va ala aalihi wasallam ki jaanib se jo saheb ooton par muhaafiz muqarrar the unhe qatl kar diya aur ooton ko bhaga le gaye. phir SARKAAR ki khidmat mein yeh waaqia arz kiya gaya to un ki giraftaari ke liye ek chhota sa lashkar zafar paiker rawaana farmaya. is lashkar ne un sab ko giraftaar kar ke HUZOOR mein pesh kiya. to HUZOOR REHMATALLIL AALAMEEN sallallaho alaihi va aalihi wasallam ne un ke haq mein hukm saadir farmaya aur AAP ke hukm se un ki aankhon mein neel ki salaaiyaan pheri gayi. aur haath pair kaate gaye. aur jangal mein dalwa diye gaye. yahan tak ke usi haal mein woh mar gaye.

(Bukhari Shareef )

Dekho Saahib e Khulq e Azeem, REHMATALLIL AALAMEEN sallallaho alaihi va aalihi wasallam ke akhlaaq e azeema, AAP ne murtadon ke saath yeh ittehaad barta aur duniya ko bata diya ke islam laane ke baad jo shakhs kufr kare us ke saath ittehaad o dosti o daad ho hi nahin sakta.

Hadees 4:

Hazrat Abdullah bin Umar رضي الله عنه ne RASOOLALLAH sallallaho alaihi va ala aalihi wasallam ko farmate suna jab ke doosri rak'aat  mein rukoo se sar e Mubaarak utthaya to farmate the aye mere RAB laanat naazil kar falaan shakhs aur falaan aadmi par.

(Rawahul bukhaari)

gaur farmayein ke HUZOOR ne naam banaam kaafiron mushrikon par laanat ki ya nahin.

aur woh bhi ain namaz ke andar phir HUZOOR REHMATALLIL AALAMEEN sallallaho ta'ala alaihi va ala aalihi wasallam ka kuffaar o mushrikeen par yeh dua e laanat farmana kya Ma'azallah bad khulqi hai.???

Hadees 5:

Hazrat Abu Huraira رضي الله عنه se marwi hai farmaya jab Rasoolallah sallallaho alaihi va aalihi wasallam ne doosri rakaat se sar e Mubaarak uthaaya to farmaya aye ALLAH sakht halaakat o laanat naazil kar qabila e muzir par, aye ALLAH un par aisi qahat saali naazil kar jaisi Yusuf alaihissalaam ke zamane mein huwi. aur ek riwaayat mein itna zaayed (zyada) hai ke arab ke sarkashon ke naam le le kar dua e halaakat farmayi.

aur Yunus ki riwaayat mein hai ke aye ALLAH laanat naazil kar ra'al aur zakwaan aur asya par, unhone ALLAH aur uske Rasool ki naafarmaani ki.
unhone kaha phir hum ko khabar mili ke Huzoor ne isko namaz mein tark farma diya.

(Rawahul bukhaari o muslim.)

Ab koi pooche in sulah kulliyon se ke aye Sulah kulliyon! Batao ke yeh dushmanaan e Khuda o Rasool ke saath yaaraana hai ya unke haq mein dua e halaakat o barbaadi.???

Hadees 6:

Huzoor sallallaho alaihi va aala aalihi wasallam ne khandaq ke roz irshaad farmaya, ALLAH ta'ala in kaafiron ke gharon aur qabron ko aag se bhar de. jis tarah ke inhone hum ko namaz e asr se baaz rakha yahan tak ke aftaab gurub hogaya.

(Rawahul bukhaari)

Ab gaur karna hai ke is se badh kar aur kya dua e halaakat ho sakti hai. yeh dua to duniya o aakhirat ki barbaadi ke liye hai. dunyawi to yeh ke unke gharon ko ALLAH aag se bhar de aur aakhirat ki yeh ke un ki qabron ko aag se pur kar de. Duniya bhi barbaad, aakhirat bhi tabaah.

yeh hai kuffaar o mushrikeen o aadaa e Deen ke haq mein Rehmatul lil aalamin sallallaho alaihi va aala aalihi wasallam ki dua e halaakat aur yeh hai khulq e azeem.  Mumkin hai koyi ayyaar yeh keh de ke yeh Huzoor ke khasa'is ( khusoosiyat ) se hai to ab ummat ko jo taaleem hai woh suniye.

Hadees 7:

HUZOOR e Akram sallallaho alaihi va aala aalihi wasallam farmate hain.
"jab kisi bad-mazhab bad-deen ko dekho to us ke rubaru us se tursh-ruyi ( gusse se dekho ) karo is liye ke ALLAH ta'ala har bad- mazhab ko dushman rakhta hai. in mein se koyi pul siraat par guzar na paayega. balke tukde tukde hokar aag mein gir padeinge jaise tiddiyaan aur makhkhiyaan girti hain."

Hadees 8:

HUZOOR E AQDAS sallallahu alaihi va aalihi wasallam farmaate hain.
"kadariyon ke paas na baithon aur na unse ibteda ba-salaam karo ya unhe kisi mu'aamle mein panch na banao.

Hadees 9:

HUZOOR Sarkaar Madina sallallahu alaihi va aalihi wasallam ko abu Imama baahli رضي الله عنه  se irshaad farmate suna "kisi kadari ya murji ya khaarji ke paas na baith, yeh log deen ko aundha karte hain jaise bartan aundhaya jaata hai. aur ubal kar hadd se guzar jaate hain jaise yahoodi o nasaara guzar gaye.

( kadari wo firqa hai jo takdeer ka inkaar karta hai)

Hadees 10:

Huzoor RASOOL e Kareem sallallahu alaihi va aala aalihi wasallam ne farmaya.
"tamaam nek kaamon mein ALLAH ta'ala ko jo sab se zyada pasandida kaam hai woh ALLAH ke liye ALLAH waalon se dosti aur ALLAH ke dushmanon bad-mazhabon se nafrat wa bezaari hai.

Yaani aamaal e sauleha mein mashgooli bure kaamon se parhez o bezaari se aur nawaafil padhne aur nafli roze rakhne se yeh amal ALLAH ta'ala ko zyada mehboob hai ke USKE pyare Imaan waalon ke saath mohabbat rakhi jaaye aur ALLAH ke dushmanon bad-mazhabon, murtaddon ke saath nafrat o bezaari barti jaaye sirf itna hi nahin balke faraaiz o waajibaat bhi bagair Hubb Fillaah wa Bugz-Fillaah ke hargiz qabool nahi hote.

Hadees 11:

Huzoor NABI Ummi sallallahu alaihi va aala aalihi wasallam farmate hain.
"jis ne ALLAH ke liye ALLAH waalon se mohabbat wa dosti ki aur ALLAH ke liye ALLAH ke dushmanon se bugz o nafrat rakhi aur ALLAH ke liye Imaan waalon ko diya aur dushmanaan e KHUDA o RASOOL ko dene se ALLAH ke liye haath roka to yaqeenan usne apne Imaan ko kaamil kar liya ya kamaal e Imaan ka martaba paa liya.

(ABU DAWOOD O TIRMIZI)

Zaid (xyz) aur iske humnawa dekhein ke Imaan kab kaamil hota hai aur kamaal e Imaan kab haasil hota hai.

Hadees 12:

Huzoor Mehboob e Khuda Sallallahu alaihi va aala aalihi wasallam farmate hain.

jab faasiq ki taareef ki jaati hai to RAB azza wa jalla gazab farmata hai aur is ke sabab arsh e Ilaahi hil jaata hai.
Isi mazmoon ko hazrat Maulana Jalaalul millat waddeen Roomi رضي الله عنه apni masnawi sharif mein yun farmate hain.
" MEE BA LARZAD ARSH AZ MADHE SHAQI. BAD GUMAAN GARDAD AZ WAHAM MUTTAQI" Yaani jo shakhs mazhaban bad-bakht hain unki taareef karne se arsh e Ilaahi hil jaata hai. aur isko sun kar muttaqi bad-gumaan ho jaata hai.

Hadees 13:

Huzoor Rauf o Raheem Sallallahu alaihi va aala aalihi wasallam farmate hain.
beshak ALLAH ta'ala gazab farmata hai jab zameen mein faasiq (fisq karnewala) ki madah (taareef) ki jaati hai.

(Baihaqi)

Zaid (xyz) aur iske humnawa yeh dekhein  ke faasiq ki madah ( taareef) saraayi par yeh qahar o gazab hai to bad-mazhab bad-deen o murtaddeen ki taareef karne par kya hoga. phir bad-mazhabon, kaafiron, mushrikon, murtaddon ke saath mel-jol, ittehaad o ittefaaq rakhne yaraana gaanthne par kya hoga.

( wal ayaaz billaahi ta'ala).

Hadees 14:

Huzoor Rasool e Kareem sallallahu alaihi va aalihis salaatu vat-tasleem farmate hain.  jo kisi bad-bazhab ki tauqeer (izzat) kare usne Islam ke dhhaane par madad di.

Hadees 15:

Huzoor Sarkaar do Aalam sallallahu alaihi va aalihi wasallam ka irshaad hai.
jo kisi bad-mazhab ki taraf is ki tauqeer karne ko chale usne Islam ke dhhaane mein e'aanat (madad) ki.

Hadees 16:

HUZOOR e Aqdas sallallahu alaihi va aalihi wasallam farmate hain.
Teen baatein hain ke jis mein hon woh abdaal se hai.

Awwal qazaa e Ilaahi par raazi hona.

Duwwam ALLAH azza wa jalla ne jin baaton se mana farmaya hai un se baaz rehna.

Suwwam aur ALLAH ke mu'aamle mein gazab o gussa karna.

Hadees 17:

HUZOOR MAALIK E KAUNAIN sallallahu alaihi va aala aalihi wasallam farmate hain.

ALLAH azza wa jalla ne AMBIYA E KIRAAM alaihimussalaatu wassalaam mein se ek NABI ko WAHI farmayi ke falaan aabid se keh dijiye ke tera duniya mein zaahidaana zindagi guzaarna to apne nafs ki raahat ko tu ne haasil kar liya. Aur duniya se tera be-ilaaqa hokar meri taraf mutawajjah ho jaana to is zariye se tu ne izzat haasil kar li. To MERA tujh par jo haq hai is ke silsile mein tu ne kya amal kiya.

Us aabid ne kaha. Aye mere RAB aur kya TERA haq mujh par hai. ALLAH tabaarak va ta'ala ne farmaya kya MERE liye kisi dost ke saath tu ne dosti ki aur kya MERE liye kisi dushman ke saath dushmani ki ???

(Abu Naeem)

Hadees 18:

HUZOOR DAAFI'UL -BALAA wal-wabaa sallallahu alaihi va aalihi wasallam farmate hain.

Imaan ka sab se zyada mazboot kadaa yeh hai, Ke ALLAH hi ke liye aapas mein ek doosre ke saath mohabbat ki jaaye. Aur ALLAH hi ke liye ulfat rakhi jaaye aur ALLAH hi ke liye nafrat rakhi jaaye.

Hadees 19:

HUZOOR AAQA E DAARAIN sallallahu alaihi va aala aalihi wasallam farmate hain.

Imaan ke kadon mein sab se zyada mazboot kadaa ALLAH hi ke liye mohabbat karna aur ALLAH hi ke liye adaawat rakhna hai.

Hadees 20:

HUZOOR daafa' ulbalaa wal-wabaa wal-qahat wal-marz wal-alam sallallaho alaihi va ala aalihi wasallam ko un ke RAB azza wa jalla ne Apne fazl o karam se qaasim jumla ne'am banaya, Mohsin e do aalam, balke Rehmatallil aalameen farmaya lekin apne gulaamaan e baargaah o bandagaan e dargaah ko taaleem dene ke liye apne RAB tabaarak o ta'ala ki baargaah mein HUZOOR yeh dua arz karte hain.

Aye ALLAH mujh par badkaar ka ahsaan na hone dena ke us se Mera dil mohabbat karne lage kyunke beshak Maine is kalaam mein jo Mujh par bazaria-e- Wahi naazil kiya gaya hai Yeh aayat paayi hai ke aye Mehboob tum in logon ko jo ALLAH aur qayamat ke din par Imaan rakhte hain Aisa na paaoge ke woh ALLAH aur uske RASOOL ke mukhaalifon se dosti rakhein.

 Hadees 21:

HUZOOR E AQDAS sallallaho alaihi va aalihi wasallam farmate hain. Agar bad-mazhab bimaar pade to poochne Na jaao, aur agar woh mar jaaye to janaaze par haazir Na ho, aur jab unhe milo to salaam Na karo, aur unke paas Na baithho, unke saath paani Na piyo, unke saath khaana Na khao, unse shaadi biyaah Na karo, Un ke janaze ki namaz Na padho aur Unke saath namaz Na padho.

( muslim shareef )

Hadees 22:

HUZOOR SAAQI E KAUSAR sallallaho alaihi va aalihi wasallam farmate hain.
un bad-mazhabon se MAIN bezaar hoon aur woh MUJH se be-ilaaqa hain. Un par jihaad aisa hai jaisa kaafiraan-e-turk o dailam par..

Hadees 23:

HUZOOR SHAAFI E MEHSHAR sallallaho alaihi va aalihi wasallam farmate hain. jab bani israil gunaahon mein mubtela huwe to unke Ulema ne unhe mana kiya, woh baaz na aaye to yeh Ulema un ke jalson mein shareek hone lage aur un ke saath hum niwaala o hum piyaala rahe. Pas ALLAH ta'ala ne unke dil ek doosre par maar diye (yaani paas baithne se badkaari ka asar in aalimon ke dilon par bhi daud gaya) aur ALLAH azza wa jalla ne Dawood aur Isaa bin Maryam alaihimas salaam ki zabaani un sab par laanat farmayi, yeh badla tha unki Na-farmaaniyon ka aur hadd se badhne ka. Qasam USKI jis ke qabza-e-qudrat mein MERI jaan hai tum azaab se najaat na paaoge jab tak unhein haq ki taraf khoob jhuka na laao.

(Imam Ahmed'Abu Daood'Tirmizi'Ibne Maajah)

Ulema o mashaikh ko tambeeh farmaayi jaa rahi hai. Dekhiye bawajood yeh ke woh ulema manaa karte the. Lekin jab woh baaz na aaye to yeh ulema unke paas baithne uthne lage ke shayed yun unhein hidaayat ho. Magar hua yeh ke qaum ki hidayat ki bajaaye unhone khud apne aap ko halaak kar diya. Is hadees sharif ne un policy baaz waa'izon aur maulviyon ka bhi radd kar diya jo kehte hain ke ji bad-mazhabon se ulfat o mohabbat aur mel-jol kar ke unhein hidaayat karna chaahiye, unke majmon mein, jalson mein rukn aur mimbar ban kar aur shareek ho kar bataana chaahiye. Hadees e kareem ne saaf farma diya Ke bad-mazhabon ki sohbat ka asar yeh hota hai.

(wal ayaaz billaahi tabaarak wa ta'ala)

Hadees 25:

HUZOOR MEHBOOB E KHUDA sallallaho alaihi va aala aalihi wasallam farmate hain.
Jo kisi bad-mazhab ko us ki bad-mazhabi ki wajah se dushman jaan kar us se munh phere ALLAH ta'ala uska dil Imaan se bhar de. Aur jo shakhs kisi bad-mazhab ko jhidke ALLAH ta'ala usey us badi ghabraahat ke din Amaan de. Aur jo kisi bad-mazhab ki tazleel (zaleel) kare ALLAH ta'ala jannat mein us ke sau (100 ) darje buland farmaye. Aur jo kisi bad-mazhab ko salaam kare ya us se khushi ke saath mile ya uske saamne aise baat kare jis se us ka dil khush hua usne halki jaani woh cheez jo utaari gayi MUHAMMAD sallallaho alaihi va ala aalihi wasallam par.

Dekho bad-mazhab o bad-deen se door-nafoor rehne waale par kya kya KHUDA ki ne'matein hain. Aur bad-mazhabon se yaaraana gaanthne, bhai-chaara rachaane waalon par kya kya wa'eedein hain.

Hadees 26:

HUZOOR REHMATULLIL AALAMEEN sallallaho alaihi va aala aalihi wasallam farmate hain.

jab is ummat ke pichle log is ummat ke aglon (sahaba e kiraam o ahle bait izaam   رضي الله عنهم  aimma-e- mujtehideen   رحمت لله عليه ) par laanat karne lagein to us waqt jis ne ba-wajood isteta'at ek kalma-e-haq bhi chhupaya to yaqeenan usne us cheez ko chhupaya jo ALLAH ta'ala ne naazil farmayi.

Hadees 27:

HUZOOR NOOR E MUJASSAM sallallaho alaihi va aala aalihi wasallam ne jang-e-quraiza ke roz hazrat e HASSAAN bin saabit رضي الله عنه  se irshaad farmaya.
mushrikeen ki hiju wa mazammat kar, ke JIBRAEEL عليه السلام  tere saath hain. Aur RASOOL E KAREEM sallallaho alaihi va aala aalihi wasallam hazrat e  HASSAAN رضي الله عنه se farmaya karte the ke meri taraf se kaafiron ko jawaab de,
aye ALLAH! TU Hassaan ki taa'eed Rooh ul quds se farma.

(Rawahul Bukhaari o Muslim)

Hadees 28:

HUZOOR E AQDAS sallallaho alaihi va aalihi wasallam ne irshaad farmaya. Quraishi kaafiron ki buraiyaan aur un ke uyoob bayaan karo ke beshak yeh kaam teer maarne se bhi zyada un par sakht hai.

(Muslim shareef)

Hadees 29:

maine RASOOLULLAH sallallaho alaihi va aala aalihi wasallam ko Hassaan se farmate suna ke Rooh ul quds Jibraeel alaihissalaam teri taa'eed farmate hain jab tak tu ALLAH wa RASOOL jalla jalaaluhu wa sallallaho alaihi va aala aalihi wasallam ki jaanib se un ke dushmanon ke saath mukhaasimat o mudaafi'at karta rehta hai. Aur faramaya ke maine RASOOLALLAH sallallaho alaihi va aala aalihi wasallam ko farmate suna ke Hassaan ne kaafiron mushrikon ke uyoob unki buraaiyon ka bayaan kiya to musalmaanon ko us ne shifa di aur apne aap bhi shifa haasil ki.

(Muslim shareef)

Is Mubarak hadees se maaloom hua ke kaafiron murtaddon bad-mazhabon ke uyoob o nuqaayes bayaan karne se Imaan waalon ko shifa haasil hoti hai, ruhaani bimaariyan door hoti hain. Kyunke daafa ul balaa wal waba ila yaumul jazaa sallallaho alaihi va aala aalihi wasallam ke dushmanon bad-goyon ka radd o tar hai.

Hadees 30:

RASOOLALLAH sallallahu alaihi va aala aalihi wasallam Hazrat Hassaan رضي الله عنه  ke liye masjid e nabvi sharif mein mimbar bichaaya karte ke woh is par khade ho kar HUZOOR E AQDAS sallallahu alaihi va aala aalihi wasallam ke liye aur HUZOOR E AKRAM ki taraf se kaafiron mushrikon par mufaakhirun hasbihi wa nasbihi ka nazm mein bayaan kiya karte the ya kuffaar o mushrikeen ki hiju o mazammat mein nazmein padha karte the. Aur RASOOLALLAH sallallahu alaihi va aala aalihi wasallam farmaya karte the ke beshak ALLAH ta'ala Roohul quds se Hassaan ki taa'eed farmata rehta hai. Jab tak Hassaan meri taraf se mufaakharat (fakhr karna) o munaafakhat   ( badaayi bayaan karna ) karte rehte hain.

( Rawahul Bukhaari )

Hadees 31:

HUZOOR E AQDAS sallallahu alaihi va aala aalihi wasallam ki baargah e bekas panaah mein Hazrat Kaab bin maalik رضي الله عنه  ne arz ki:

Beshak ALLAH ta'ala ne she'r ke baare mein to jo naazil farmaya hai woh naazil hi farma diya hai. Aur woh ALLAH ta'ala ka yeh irshaad hai.

Aur shaa'iron ki pairwi gumraah karte hain. Kya tum ne na dekha ke woh har naale mein sar-gardaa phirte hain. Aur woh kehte hain jo nahin karte (tarjuma razwiya) HUZOOR Sarkar e Madina sallallahu alaihi va aala aalihi wasallam ke sho'ra Hazrat Kaab bin Maalik o Hazrat Hassaan bin Saabit o Hazrat Abdulla bin rawama رضي الله عنهم  the. Hazrat Kaab  رضي الله عنه kuffaar o mushrikeen ko apni nazmon mein jang o harab se khauf-naak kiya karte the. Aur Hazrat Hassaan  رضي الله عنه kuffaar o mushrikeen ke nasabi o khaandaani uyoob o naqaayis apne qaseedon mein bayaan kiya karte the aur Hazrat Abdullah        رضي الله عنه apne ash'aar mein kuffaar  o mushrikeen ko unke kufr o shirk par sharm o gairat aur nang o aar dilaaya karte the. Hazrat Kaab رضي الله عنه ki is arz ka matlab yeh tha ke kya is qism ke ash'aar kehna bhi hamare liye najaayez farma diya.

To NABI E KAREEM sallallahu alaihi va aala aalihi wasallam ne irshad farmaya ke beshak Imaan waala apni talwaar se bhi jihaad karta hai aur apni zabaan se bhi jihaad karta hai. US Zaat ki qasam jis ke qabza e qudrat mein MERI jaan hai. Beshak tum apne ash'aar ke zariye se kaafiron mushrikon ke dilon par teer barsaate ho. Jis tarah teeron se in ko zakhmi karte ho.

Is hadees sharif ne irshaad farmaya ke ash'aar mein kuffaar o mushrikeen o murtaddeen ki mazammat o hiju karna is liye ke musalmaan is ko sun kar un ke aqaaid e  kufriya se mutanaffir o bezaar hokar apne islam aur apni sunniyat ko un ke daam-e-makr o fareb mein phansne se bachaayein, yeh bhi jihaad bil-lisaan hai

Hadees 32:

HUZOOR SARKAAR E DO AALAM sallallahu alaihi va aala aalihi wasallam farmate hain.

koyi NABI  ALLAH TA'ALA ne MUJH se pehle nahin bheja magar USKI ummat mein ansaar o as'haab hote rahe ke woh apne NABI ki sunnat USKE tareeqe par amal karte the aur apne NABI ke ahkaam o irshaadaat ki pairwi karte the (aur MUJHE bhi aise hi ansaar o as'haab diye gaye) phir yaqeenan paida honge MERI ummat mein bure na-khalf log jo kahenge woh karenge nahin aur jo karenge uske maamoor nahin hoge. To jo un se haath se jihaad karega woh Imaandaar hai. Aur jo un bad-mazhabon se zabaan se jihaad karega woh bhi Imaan waala hai. Aur jo zabaan se bhi un ka radd o tard karne ki qudrat unke uyoob ko bayaan karne ki isteta'at nahin rakhta aur dil se unko bad-mazhab bad-deen jaanta aur unse nafrat o bezaari rakhta hai woh bhi momin muslim hai. Aur is ke baad raai ke daane baraabar bhi Imaan nahin hai.

( Muslim Shareef )

Is hadees sharif ne jihaad ki teen qismen bayaan farmayi. Jihaad e Sinaani, jihaad e Lisaani, jihaad e Jinaani. Aur agar bad-mazhabon bad-deenon ko dil se bhi bura na jaane, unse yaaraana gaanthe, dostaana rakhe to woh be-imaan hai. Aur pur-zaahir ke jihaad qalmi bhi usi jihaad e lisaani hi ki ek behtareen soorat hai. Ke  Alqalamun Ahdeeyul lilsaaneen hai.
Aur yeh bhi maaloom hua ke HUZOOR E AKRAM sallallahu alaihi va aala alihi wasallam ko ALLAH TA'ALA ne ilm e gaib ataa farmaya, ilm e khams bakhsha ke is hadees sharif mein ilm e maafi ala salaab ka saboot maujood hai.

Hadees 33:

HUZOOR JANAAB E RISAALAT ma'aab sallallahu alaihi va aala aalihi wasallam farmate hain.

jis ne diya ALLAH ke waaste aur dene se inkaar kiya ALLAH ke waaste aur Imaan waalon se ALLAH ke liye dosti ki aur bad-mazhabon, bad-deenon se ALLAH ke waaste dushmani rakhi to beshak usne apne Imaan ko kaamil kar liya.

( Tirmizi Shareef )

Hadees 34:

Hazrat Allama Sayyed Ismail bin Haafiz e kutub Sayyed Khalil Haafiz Kutbul Haram al-makki quddisallah ta'ala sirrahu al-mulki apni tasdeeq " Fatawa al Harmain barajaf nadwatul-meen" mein naql farmaate hain.

Shirk isse bhi zyada pinhaa ( chhupa hua) hai Jaise chikni chattaan par andheri raat mein chyunti ki chaal. Aur adna darja is ka yeh hai ke tu zulm o khilaaf-e-haq ki zara si baat ke saath bhi mohabbat rakhe.
Aur kisi qadar adl o insaaf ki zara si baat se bhi adaawat rakhe.  Aur Deen hai kya?

Isi hub o bugz ka to naam hai.
Yaani ALLAH ke liye ALLAH  waalon se dosti aur ALLAH ke liye ALLAH ke dushmanon se nafrat o bezaari rakhta hai to Imaan daar hai warna nahin.

( Rawahul Haakim wa Sahha )

Hadees 35:

HUZOOR e Aqdas sallallaho alaihi va ala aalihi wasallam irshaad farmate hain.
Tamaam nek kaamon mein sab se afzal amal ALLAH azza wa jalla ke waaste dosti rakhna aur ALLAH azza wa jalla ke waaste dushmani rakhna hai.

( Abu Dawood )

Hadees 36:

Huzoor Sarkaare do aalam sallallaho alaihi va ala aalihi wasallam farmate hain. Kisi cheez ki mohabbat tujh ko andha behra bana deti hai.

( Rawahul Imam Ahmed wal Bukhaari)

Haq ki mohabbat baatil baaton ke dekhne sunne se rok deti hai. Aur baatil ki mohabbat haq baaton ke dekhne aur sunne se behra kar deti hai. Matlab yeh hua ke baatil ki mohabbat apne dilon se nikaal do ke woh tumhe haq baaton ke dekhne sunne se mehroom kar degi. Aur haq ki himaayat apne quloob mein jamaao ke baatil ko na tumhari aankhen dekh sakein  na tumhare kaan sun sakein.

Hadees 37:

RASOOLALLAH sallallahu alaihi va aala aalihi wasallam farmate hain.

Jis shakhs ne naa-haq par apni qaum ki madad ki to woh is oont ki tarah hai jo kuwein mein gir gaya ho aur us ki dum pakad kar usey kheencha ja raha ho.

(Abu Dawood )

Hadees 38:

Hazrat Waasila bin ashqa' رضي الله عنه farmate hain.
maine arz ki YAA RASOOLALLAH ! sallallahu alaihi va aala aalihi wasallam  Asbiyyat kya hai.?

HUZOOR E AQDAS sallallahu alaihi va aala aalihi wasallam ne farmaya. Asbiyyat ta'asub ki taareef yeh hai ke tu apni qaum ko zulm karte huwe dekh kar bhi un ki i'aanat imdaad kare.

Subhanallah is hadees shareef ne asbiyyat ta'asub ki saheeh taareef farma kar pilpilon suleh kulliyon bad-mazhabon ki dahen dozi farma di ke khud HUZOOR SARKAAR E DO AALAM  sallallahu alaihi va aala aalihi wasallam ne farma diya ke ta'asub yeh hai ke baatil par kisi ki taraf daari kare jaise deobandi, nechri, qaadiyaani, raafzi, khaaksari, muslim leagi, ahraari wagairhum firq-e-naari apne tawagiyat ki baatil parasti par tarafdaari kar rahe hain. Aur haq ka saath dena. Haq baat ki tarafdaari karna ta'asub nahin hai Balke yeh apne aqaayed e haqqa par pukhtagi wa salaamat rawi hai aur yeh mehmood hai aur jo is ko ta'asub kahe woh Deen se begaana aur HUZOOR RASOOL E KAREEM sallallahu alaihi va aala aalihi wasallam ka mukhaalif aur baargaah e risaalat se mardood hai.

Hadees 39:

Abada bin Kaseer Shaami ek bibi se riwaayat karte hain jo ke falasteen ki rehne waali hain aur un ka naam fasilah hai, woh kehti hain ke maine apne baap ko yeh kehte suna ke,  maine RASOOLALLAH sallallahu alaihi va aala aalihi wasallam se sawaal kiya, maine arz ki YA RASOOLALLAH ! صَلَّى اللَّهُ عَلَيْهِ وَسَلَّمَ kya yeh baat ta'assub mein daakhil hai ke insaan apni qaum se mohabbat kare to AAP sallallahu alaihi wasallam ne farmaya nahi, balke ta'assub yeh hai ke aadmi zulm o naahaq par apni qaum ki madad kare.

(Rawahul Imam Ahmed wa Ibne Maajah)
In donon Mubaarak hadeeson ne ta'assub ko saaf farma diya jo aaj kal policy baaz waa'iz lecturaar wa molvi kaha karte hain ke ulma e ahle sunnat o jamaat kasar-hamullah ta'ala wa aidihim bade muta'assib hain. Un ka yeh kehna saraasar zulm o ifterah hai. Kyunke radd-e-bad-mazhabaan to mehmood hai. Aur ta'assub yeh hua ke naa-haq par tarafdaari o madad ki jaaye to hazraat ulma e ahle sunnat ka daaman is se paak hai, woh to Haq pasand hain. Haan woh qaaileen khud in ahaadees e mubaaraka ki bina par muta'assib saabit ho gaye ke baatil o naa-haq ki tarafdaari kar rahe hain aur madad pohoncha rahe hain. Aur isi ko in hadeeson mein ta'assub bataaya gaya hai.  Tafseer Azeezi paara awwal, matbua Muhammadi Lahore safha 327 hazrat Maulana Shah Abdul Azeez sahib mohaddis dehlvi Aayate karima ke tahet mein farmate hain:

"Wa mani tasallub haq aanast ke deen haq. Ra-baquwwat bagirad wa hargiz badeene wa aayine nazar na kund wa ba-talbisaat e shayateen wa istadrajaat e jogya wa rahabeen gosh nanhad wa ba-sabab wa rod e masayeb wa imtehanaat dar husn e deen khud shak taraddud paida na-kund wa een amar mehmood dar jamee addiyaan wa matloob dar bar zamaan sat wa maani ta'assub aanast ke ba-sabab hamiyat rasm khud ya riyaasat e khaandaan e khud bar mazhab digar ba wasaf zahoor alamaat haqeeqat e aan inkaar numayad wa bad e khud ra nek wa nek e gair e khud ra bad danad wa een amar mardood o mayoob sat."

Yaani tasallub e haq ke maani yeh hain ke deen e haq ko mazbooti ke saath pakad le aur kisi doosre deen ya kisi doosre tareeqe ki taraf hargiz aankh uthakar bhi na dekhe aur shaitaanon ke fareb se bhari huwi baaton aur jogiyon saadhuwon ke istadraaji khuwariq e aadaat ki taraf qat'an kaan na lagaaye aur musibaton aur aazmaaishon ke aa jaane ki wajah se apne sachche deen ki khoobi mein kisi tarah ka shak o taraddud hargiz paida na hone de aur yeh tasallub e haq tamaam addiyaan e ilaahiya mein pasandeeda wa mehboob aur har zamaane mein matloob o margoob hai. Aur ta'assub e baatil ke maani yeh hain ke apni rasm ya apne khaandaani aizaaz ki paasdaari ke sabab doosre mazhab ko us ki haqqaaniyat ke dalaail o baraheen waazah ho jaane ke baad bhi us sachche mazhab ko na maane aur uska inkaar kare aur apne bure ko bhala aur deen e haq ke maanne waalon ke bhale ko bura jaane aur yeh ta'assub baatil mardood o maayoob hai.

Hadees 40:

HUZOOR KHAATIMUL AMBIYA sallallaho alaihi va aala aalihi wasallam farmate hain.  Mominon ke siwa kisi aur ki sohbat mein mat baith. Aur muttaqi ke siwa teri daawat ka khaana koyi aur na khaaye.

(Tirmizi wa Abu Dawood)

Hadees 41:

HUZOOR SHAAFI E MEHSHAR sallallaho alaihi va aala aalihi wasallam ne Hazrat Abu zar رضي الله عنه  se farmaya.
Aye Abu zar! Imaan ke kadon mein kaun sa kadaa sab se zyada mazboot hai.
Unhon ne arz ki ALLAH aur us ka RASOOL ziyada jaanne waala hai.

Irshaad farmaya ke ALLAH ke baare mein baahum ek doosre ki madad karna aur ALLAH ke liye mohabbat karna aur ALLAH ke liye dushmani rakhna.

( Rawahul Bahiqui )

Hadees 42:

Hazrat Abu Zar رضي الله عنه farmate hain.
RASOOLALLAH sallallahu alaihi va aala aalihi wasallam hum par jalwa farma huwe. Farmaya kya tumhein khabar hai ke kaun sa amal ALLAH ta'ala ko sab se zyada mehboob hai. Kisi kehne waale ne arz ki Namaz o Roza aur Zakaat aur kisi ne arz ki Jihaad. HUZOOR REHMAT E MUJASSAM sallallahu alaihi va aala aalihi wasallam ne farmaya beshak tamaam aamaal mein ALLAH ta'ala ko sab se zyada mehboob o pasandeeda amal ALLAH ke liye mohabbat o dosti rakhna aur ALLAH ke liye adaawat o dushmani rakhna hai.

(Rawahul Imaam Ahmed )

Hadees 43:

HUZOOR KHALIFATULLAH AL-AAZAM sallallaho alaihi va ala aalihi wasallam farmate hain.

Aadmi apne dost ke Deen par hota hai to tum mein se har ek dekh bhaal karle ke woh kis ke saath dosti rakhta hai.

( Rawahul Imam Ahmed wa Al-Tirmizi wa Abu Dawood wa Al-Bahiqui )

Hadees 44:

HUZOOR MAALIK E KAUNAIN  sallallaho alaihi va aala aalihi wasallam Hazrat Abu razeen رضي الله عنه  se farmate hain.
Kya Main tujh ko woh baat na bata doon jis par is ka Deen ka daar o madaar hai jis ke zariye se tu duniya o aakhirat ki bhalaayi haasil kar lega.

Khuda o Rasool jalla jalaaluhu wa sallallaho alaihi va ala aalihi wasallam ka zikr karne waalon ki majlison mein haazir hona laazim karle. Aur jab tanhaayi mein ho to tujh se jis qadar ho sake apni zabaan ko ALLAH ta'ala ke zikr mein mutaharrik rakh (aur ALLAH ke RASOOL ka zikr KHUDA hi ka zikr hai balke deen e islam o shariyat e islaamiya ki har ek baat ka zikr ALLAH ta'ala ke har ek pyare ka zikr ALLAH ta'ala hi ka zikr hai). Aur ALLAH ke waaste mohabbat rakh aur ALLAH ke waaste adaawat rakh.Aye Abu razeen kya tujhe khabar hai ke musalmaan jab apne ghar se apne musalmaan bhai ki mulaaqaat ke liye nikalta hai to sattar hazaar farishte is ke saath ho lete hain. Woh sab farishte is par durood bhejte hain aur arz karte hain aye hamare RAB beshak is musalmaan ne  TERI mohabbat mein rishta joda TU bhi apne karam o fazl ko is se muta'alliq farma de. To aye Abu razeen! Agar tu apne badan ko is kaam mein laa sake to yeh kaam kar.

Ahle Imaan dekhein ke musalmaan ke saath dosti o ittehaad rakhne waale aur bad-mazhab se bezaar rehne waale par kitni ALLAH ki rehmatein aur barkatein hain.

( Rawahul Bahiqui )

Hadees 45:

Hazrat Maaz bin jabal رضي الله عنه se marwi hai ke maine RASOOLALAAH sallallaho alaihi va aala aalihi wasallam se poocha ke afzal tareen Imaan kya hai.
HUZOOR E AQDAS sallallaho alaihi va aala aalihi wasallam ne farmaya yeh ke tu ALLAH ke waaste mohabbat rakhe aur ALLAH ke waaste adaawat rakhe aur apni zabaan ko ALLAH ke zikr mein mashghool rakhe.

Hazrat Maaz رضي الله عنه  ne arz ki ya RASOOLALLAH ! صَلَّى اللَّهُ عَلَيْهِ وَسَلَّمَ is ke baad phir main kya karoon?
HUZOOR E AQDAS sallallaho alaihi va aala aalihi wasallam ne farmaya aur yeh kar ke logon ke liye tu woh pasand kar jo tu khud apni zaat ke liye pasand karta hai. Aur un ke liye woh pasand na kar jo tu apni zaat ke liye naapasand karta hai.
Is Hadees sharif ke isi pichhle jumla e Mubarak ki sharah mein Hazrat Sayyedna Abdulla bin Abbas رضي الله عنهما ka yeh irshad e Mubarak hai ke farmaya;

ALLAH tabaarak va ta'ala farmata hai ke beshak ALLAH ta'ala adl o ehsaan ka hukm deta hai to adl ke maani yeh hain ke ALLAH ta'ala ko wahdahu laa sharika lahu maane aur ehsaan ke maani yeh hain ke tu ALLAH ta'ala ki ibaadat is tarah kare goya tu USEY dekh raha hai. Aur yeh ke tu logon ke liye wohi pasand kare jo tu khud apne liye pasand karta hai. Agar doosra shakhs Imaan waala hai to teri khushi yeh ho ke us ke Imaan ka darja aur bhi zaayed buland ho jaaye aur woh kaafir hai to teri khushi yeh ho ke woh bhi tera islami bhai ban jaaye. Is irshad ko Imam Allama Qudwatul umma Naasir al-sharia muhiyus sunnat Hazrat Alauddeen Ali bin Muhammad bin Ibrahim Baghdadi Sufi Maaroof Khaazin رحمت لله عليه  ne apni tafseer khaazin musamma ba jild chaharum matboo matbae taqdeem almiya misr safha 90 mein isi aayat e karima ke maatahat naql farmaya.

Hadees 46:

HUZOOR MADNI TAAJDAAR sallallahu alaihi va aala aalihi wasallam ila yaumal qaraar farmate hain.
Aakhir zamaane mein bohot se dajjaal bade dhoke baaz aur jhoote honge, woh tum ko hadeesein gadh gadh kar sunaayenge jo na tum ne suni hongi aur na tumhare baap dada ne suni hongi. To un se door rehna aur unko apne se door rakhna, kahin woh log tum ko haq se behka na dein, kahin woh tum ko fitne mein na daal dein.

( Rawaah Muslim An Abi Hurairah radiyallahu anhu )

Is Hadees sharif ne yeh bhi bataaya ke bad-mazhabon, murtaddon se door-nufoor raho aur yeh bhi bataaya ke ALLAH ta'ala ne HUZOOR E AKRAM sallallaho alaihi va aala aalihi wasallam ko uloom e gaibiya ataa farmaya hain ke in khabeeson ki khabar pehle hi de diye hain...

Hadees 47:

HUZOOR E AQDAS sallallaho alaihi va aala aalihi wasallam farmate hain.
Ek jamaat aakhir zamaane mein ya is ummat mein niklegi (shakk-e-raawi hai) jo Qur'an padhegi aur Qur'an unke galon se neeche nahin utrega yaani Qur'an padh padh kar galat tarjume kar kar ke MERI ummat ko gumraah karenge. Alaamat is jamaat ki yeh hai ke sar bohot mundaayenge yaani chundya ghuti hui rakhenge (jaise wahabiya numa (woh hai aur jhoote sufi mutasawfa e malahida hain) jab tum unhe dekho to un se yaraana aur bhai chaara na karna, un se jang karna hasb e isteta'at khwaah sinaani ya lisaani wa jinaani.

(Rawahul Ibne Maajah)

Is hadees sharif mein bhi ilm e gaib ka saboot hai.

Hadees 48:

RASOOLALLAH sallallaho alaihi va aala aalihi wasallam ne farmaya anqareeb aakhir zamaane mein kuch mullaane honge  jaise keede, jo woh zamaana paaye to ALLAH ki panaah maange un bad-deenon se.

( Rawaah Abu Naeem )

Hadees 49:

RASOOLALLAH sallallaho alaihi va aala aalihi wasallam farmate hain beshak MERE liye ALLAH ta'ala ne as'haab chune to unhein MERE rafeeq aur MERE khusraali aur MERE madadgaar kiya aur anqareeb unke baad kuch log aayenge ke unki shaan ko ghataayenge aur unhein bura kahenge, tum unhein pao to un se shaadi biyaah, rishta daari na karna, na un ke saath khaana khaana, na paani pina, na unke saath namaz padhna aur na unke janaaze ki namaz padhna.

Shiddat o gilzat bar kuffaar ke saath saath uloom e gaibiya mustafwiya ke jalwe bhi zaahir ho rahe hain.

SUBHANALLAH.

Hadees 50:

HUZOOR MEHBOOB E KIBRIYA sallallaho alaihi va aala aalihi wasallam farmate hain.

Aakhir zamaane mein ek qaum jamaat hogi jin ko raafzi kaha jaayega woh deen e Islam ko chhod denge woh log murtad hain un par murtaddon ke ahkaam jaari hain.

Hadees 51:

HUZOOR REHMAT E MUJASSAM sallallaho alaihi va aala aalihi wasallam farmate hain.
MERI ummat kehlaane waalon mein aakhir zamaane mein ek giroh hoga jiska naam raafzi hoga, woh log Islam ko chhod denge, woh murtad hain.

Hadees 52:

HUZOOR MEHBOOB E MOHTARAM sallallaho alaihi va aala aalihi wasallam farmate hain.

Anqareeb MERE baad ek jamaat ro-numa hogi unke liye ek bura laqab hoga. Unko raafzi kaha jaayega. To aye ALI agar tum unko paana un se jung karna. Is liye ke woh murtad hain.

Hazrat ALI ne farmaya maine arz ki YA RASOOLALLAH sallallaho alaihi va aala aalihi wasallam us qaum ka naam to AAP ne bata diya hai, Unki pehchaan bhi bata dein.

HUZOOR E AKRAM sallallaho alaihi va aala aalihi wasallam ne irshaad farmaya unki pehchaan yeh hain ke tumhari taareef aisi karenge jo tum mein nahin hai (jaise NABI se afzal hona ya khilaafat e Raashida ka siwa hazrat ALI رضي الله عنه ke doosre ka haqdaar o khalifa-e-barhaq na hona ya khilaafat bila-fasal ke liye aap ka wasi-e-Rasool hona wagairah wagairah) aur aglon yani khulfa-e-salaasa رضي الله عنهم par taan karenge. ( Akhraja Al-daar e Qatnee An- Ali رضي الله عنه  )

SUBHANALLAH.

RASOOLALLAH sallallaho alaihi va aala aalihi wasallam ne APNE RAB ke bataye hue ilm-e-gaib se raafzi giroh ki bhi khabar di aur unka naam bhi bata diya. Aur pehchaan bhi bata di. Aur un se door o nufoor rehne ka bhi hukm farma diya. Yeh ilm bhi uloom-e-khamsa mein daakhil hai.

Hadees 53:

HUZOOR MEHBOOB E RABBUL AALAMEEN sallallahu alaihi va aala aalihi wasallam farmate hain.

Beshak ALLAH ta'ala ne MUJHE chuna aur MERE liye MERE as'haab aur khusraali rishtedaar pasand farmaye aur anqareeb ek jamaat aayegi jo un Sahaba-e-kiraam رضي الله عنهم ko bura kahegi aur unke uyoob dhoondegi to tum un ki majlison mein na jaana, unke saath paani na pina, khaana na khaana, unke saath shaadi biyaah rishta daari na karna.

Hadees 54:

HUZOOR E AQDAS sallallahu alaihi va aala aalihi wasallam irshaad farmaate hain  MERI ummat mein kuch toliyaan hongi, unke maulvi sakht dushwaar fitna angez masaail ka tadaawul karenge. Woh MERI ummat ke bad-tareen log hain.

Hadees 55:

HUZOOR E AKRAM sallallahu alaihi va aala aalihi wasallam farmate hain. Beshak koyi aadmi namaz padhta roza rakhta, haj o umrah aur jihaad karta hai haalaanke woh munaafiq hai. Arz ki gayi ya RASOOLALLAH sallallahu alaihi va aala aalihi wasallam nifaaq is mein kis darje se aaya. Irshaad farmaya is liye ke woh apne Imam par taan karta hai. Aur Imam iska woh hai Jis ki nisbat ALLAH ta'ala Qur'an azeem mein farmata hai ulema se poocho agar na jaante ho.
In donon Mubaarak hadeeson mein RASOOLALLAH sallalllahu alaihi va aala aalihi wasallam ne wahaabi gair muqallid najdi molviyon aur nechri wa khaaksaari o leagi wa aahraari leaderon ki khabar di hai jo ulema-e- ahle Sunnat wa hazraat-e-mujtehdeen e ummat رضي الله عنهم par taan o tashnee karte aur un se be-niyaaz hokar khud apni andhi aundhi looli langdi aqlon se Qur'an e paak ke mataalib o maani gadhte hain.

Hadees 56:

NABI E KAREEM sallallahu alaihi va aala aalihi wasallam farmate hain ALLAH ta'ala Na kisi bad-mazhab ki Namaz qabool kare Na Roza Na Zakaat Na Hajj Na Umra Na Nafl Na Farz.

Bad-mazhab Deen e Islam se nikal jaata hai jaise goondhe hue aate se baal nikal jaata hai.

( Rawah Ibne Majah wa Bahiqi)

Hadees 57:

HUZOOR NOOR E MUJASSAM sallallahu alaihi va aala aalihi wasallam farmate hain.

Agar koyi bad-mazhab mas'ala-e- taqdeer ko jhutlaane waala hajr e aswad aur maqaam e Ibrahim ke darmiyaan mazloom qatl kiya jaaye aur apne is maare jaane par woh saabir o taalib sawaab e KHUDA rahe, jab bhi ALLAH azza wa jalla us ki kisi baat par nazr e karam na farmaye yahaan tak ke us ko jahannum mein daale.

( Akhrajah Ibne Al-Joozi)

Hadees 58:

RASOOLALLAH sallallahu alaihi va aala aalihi wasallam farmate hain beshak ALLAH azza wa jalla ne MUJHE chun liya aur MERE liye as'haab chune aur un mein se MERE wazeer o madadgaar kiye aur yaqeenan anqareeb aakhir zamaane mein kuch log aayenge ke un sahaba e kiraam رضي الله عنهم ki shaan ghataayenge. Tum un ke saath khana na khana, paani na pina aur un ke saath na baitthna, un ke janaze ki namaz na padhna. Aur un ke saath namaz na padhna.

(Rawah Ibne Al-najaar An Anas رضي الله عنه )

MUSTAFA pyare sallallahu alaihi va aala aalihi wasallam ka ilme maa fil-gadd (kal ka ilm)  yahaan bhi zaahir hai.

Hadees 59:

HUZOOR SARKAAR E DO AALAM sallallahu alaihi va aala aalihi wasallam farmate hain.

Munaafiq ya bad-mazhab ko aye sardaar ! keh kar na pukaro ke agar woh tumhara sardaar ho to beshak tum ne apne RAB azza wa jalla ko naaraaz kiya.

( Rawah Abu Dawood )

Aur haakim ne Sahih Mustadrak mein ba-ifaada e taseeh aur Behqee ne Shoaibul Imaan mein in lafzon se riwaayat ki, RASOOLALLAH sallallahu alaihi va aala aalihi wasallam ne farmaya.

jo shakhs kisi munaafiq ko aye sardaar ! keh kar pukaare woh apne RAB ke gazab mein pade.

Wal ayaaz billaahi ta'ala.

Hadees 60:

HUZOOR E AKRAM sallallahu alaihi va aala aalihi wasallam farmate hain.
Kya tum log faajir ke uyoob, us ki buraaiyaan us ki kharaabiyaan bayaan karne se rukte ho.

Log usko kyun kar pehchaanenge.
Faajir ki kharaabiyaan, uske uyoob, uski buraaiyaan bayaan karo taa ke log us se bache. Aur door rahe.

Faasiq o faajir ke uyoob ko zaahir karne ki taakeed farmayi ja rahi hai to murtaddon ke uyoob o kharaabiyaan bayaan karne ki kitni taakeed hogi.

Hadees 61:

HUZOOR SAYYED E AALAM sallallahu alaihi va aala aalihi wasallam farmate hain.

Yun nahin KHUDA ki qasam zaroor zaroor tum amar bil maroof (acchhi baaton ka hukm karoge) aur nahi anil munkar (buri baaton se mana karoge) ya zaroor zaroor ALLAH ta'ala tumhare dil aapas mein ek doosre par maar dega. Phir tum sab par laanat utaarega jaise un bani israail par apni laanat utaari.

(Rawaah Abu Dawood An Abdulla bin Mas'ood رضي الله عنه)

Ulama aur Mashaaikh peeron ko khusoosan tambih farmayi jaa rahi hai. Kaash is daur ke tamaam muddaiyaan-e-sunniyat haq goyi ikhteyaar farmaye.
Aameen summa aameen.

Hadees 62:

NABI sallallahu alaihi va aala aalihi wasallam ne mana farmaya mushrikon se musaafaha karne ko aur unhe kunniyat ke saath yaad karne ko aur aate waqt un se marhaba khush aamdeed kehne ko.

( Rawaah Abu Naeem )

Yeh hukm mushrikon ke saath bartaao ka hai, Phir murtaddeen jo mushrikon se bhi ba-darjaha bad-tareen hain un ke ahkaam to badahtan is se bhi sakht hona zaroori hain.

Hadees 63:

HUZOOR MEHBOOB E KHUDA HABEEB E KIBRIYA sallallahu alaihi va aala aalihi wasallam farmate hain.

Jis musalmaan ne mushrik ke saath yaaraana, dostana, bhai-chaara gaantha us ke saath uthna baithna ikhteyaar kiya Aur mushrik ki sohbat mein rehna pasand kiya To yaqeenan woh musalmaan bhi usi tarah hai.

(Rawaah Abu Dawood An Samrah رضي الله عنه )

Gaandhiyon, congressiyon, ahraariyon, leagiyon, wagairhum ko is se sabaq haasil karna chaahiye.

Hadees 64:

HUZOOR E AQDAS sallallahu alaihi va aala aalihi wasallam irshaad farmate hain.

Jis ne kisi bad-mazhab giroh ko apni shirkat se badhaaya, raunaq di to woh unhi mein se hai aur jis ne kisi musalmaan ko daraaya Baadshah e waqt ki khushnoodi ke liye to qayaamat ke din woh usi ke saath laaya jaayega.

( Rawaah Al-Khateeb fi-Al-Taareekh An-Anas رضي الله عنه)

Hadees  65:

HUZOOR SARKAAR E DO AALAM  sallallahu alaihi va aala aalihi wasallam farmate hain.

Achche aur bure hum nasheen ki kahaawat aisi hai jaise ek (attaar) ke paas mushk hai aur doosra (lohaar) dhoonkni phoonkta hai. Woh mushk waala tujhe muft dega ya tu us se khareedega aur kuch nahi to khushbu zaroor hi aayegi. Aur dhoonkni waala ya tere kapde jalaa dega ya tujhe us se badbu aayegi.

( Rawaahul Bukhaari wa Muslim )

Hadees 66:

HUZOOR REHMAT E MUJASSAM sallallahu alaihi va aala aalihi wasallam farmate hain.

Bura hum-nasheen bad-mazhab o bad-deen dhoonkni dhoonkne waale ki maanind hai. Agar tujhe us ki siyaahi na bhi pahonche to dhuwaan to tujhe zaroor hi pahonchega.

(Rawaah Abu Dawood)